O briloso esemplo de #comunicazión en #SST de @ISSLA_Aragon

This post is also available in: Spanish

22 de setiembre de 2017. Por David Mairal.

O diya Chueves 21.Set.2017, a cuenta en Twitter d’o Instituto Aragonés de Seguranza e Salut Laboral (ISSLA) sorprendió con iste tweet (clic en a imachen t’azeder a lo tweet orichinal e lo video que contiene):

Fuen: (“ISSLA on Twitter,” n.d.)

Analizato dende l’anvista d’o emplego cheneralista de retes sozials, o tweet puede parixer un más aintro d’os continos videos-fotografías-testos d’entima que en abundan cada vegata más en os nuestros timelines.

Sin dembargo, calato en l’ambito online aplicato a lo campo d’a seguranza e salut, ye toda una lumineta comunicativa, zercano a las practicas en a comunicazión que en continan bellas organizazions líders en SST e cultura preventiva en o mundo.

O que tiene d’espezial o tweet no ye poco: trazudo emplego d’un meyo de comunizazión d’alcanze masivo, ta denuziar publicamén una practica muito concreta e inazeptable en a industria (un treballo en altaria sin prou de midas de seguranza) y espardir un prozedimiento de raso azeutato por parti de l’Istituto (ature de treballos).

Ista mena de publicazions-denuzia tan concretas -que pueden estar muito adecuatas e de feito en son practica normal de muitos ambitos profesionals e personals- son difízils de veyer en España prozediendo d’organizazions rilazionatas con a seguranza e salut, e muito menos tratando-se d’un organismo publico. Por ixo, aintro d’ixe contesto, o tweet d’o ISSLA tiene un componén d’esvielle importán.

Sin dembargo, a ran global aintro d’o campo d’a SST, dende fa muito tiempo ye muito normal trobar publicazions-denunzia parellanos prozedens de organismos importans que en operan en entornos d’estandars de seguranza e salut estacatos. Un d’os casos más significativos ye o de H.S.E. -organismo britanico regulador d’a seguranza e salut laboral-, que tiene de raso integrata aintro d’a suya estratechia de comunicazión a publicazión d’incumplimientos d’a normativa por as interpresas y as correspondiens actuazions de l’almenistrazión (Mairal, 2012). Una contrimuestra masima de transparenzia, enfiladura e saper fer profesional, de raso en continidat e retroalimentador d’a competitiva anvista de cultura preventiva en o que treballa (Mairal, 2015). O tweet d’o ISSLA achunta todas istas cualidaz, y poderba perpectamén cumplir os requisitos d’ista dexisén anvista.

L’emplego intelichén d’as ferramientas de comunicazión e informazión pueden enamplar cheometricamén os propositos que se’n acazan con os tradizionals prozedimientos almenistrativos (sanzions, piñoras, demandas….), en conzepto de sensibilizazión sozial, influyenzia en os prozesos e dezisions estratechicas aintro d’as interpresas u implicazión d’os treballadors/as.

Norabuena a lo ISSLA por a suya azertata publicazión en Twitter, que asperamos siga indizio de (u se faiga servir ta planteyar) una estratechia de comunicazión d’esito.

Bibliography

ISSLA on Twitter. (n.d.). Retrieved December 20, 2017, from https://twitter.com/ISSLA_Aragon/status/910748120400695296
Mairal, D. (2012, October 28). Gestión del medio ambiente y prevención de riesgos con carácter británico. Retrieved December 20, 2017, from http://www.aragonvalley.com/gestion-del-medio-ambiente-y-prevencion-de-riesgos-con-caracter-britanico/
Mairal, D. (2015, January 2). Reino Unido: umbral de la cultura de la seguridad; se sabe hasta en los cuentos. Retrieved December 20, 2017, from http://www.aragonvalley.com/siglo-cultura-seguridad/