O nesezario Abiento que toz femos

This post is also available in: English, Spanish

En a tradizión cristiana, Abiento ye o periodo de tiempo correspondién á os cuatro domingos chusto anteriors á lo 25 d’abiento, día de Nabidá. Allora, o pasato domingo, estió o primer domingo d’Abiento.

Ta os fiels cristianos, l’Abiento ye un tiempo d’orazión y reflesión, arrepentimiento, perdón y goy [1]

Yo no soi un fiel cristiano, pero cal que reconoxca que me fa muito goy l’Abiento. Me fa goy por o suyo simbolismo y por a epoca de l’añada en que se i zelebra, os suyos días curtos y fredos y largas nuies y tardis en casa alufrando o fuego d’una foguera con una banda sonora que en a mía tierra tiene nombre propio: zierzo [2]. Astí, si bella cosa peta fer, ixo ye replegar-se.

Antimás, l’Abiento ye de bez que o cabo d’año. Prautiques u no pas una relixión, cada cabo d’año ye un feito importán en asabelos ambitos de as nuestras bidas. Semanas antis de cada cabo d’año, toz femos, en mayor o menor mida, un balanze de cómo mos ha íu l’añada que ye á punto de rematar, pensamos en os aspeutos t’amillorar y en as azions á meter en marcha a benién añada.

“Soi an i quiero ser?”

“Qué puedo fer t’amillorar determinato aspeuto?”

O bueno de l’Abiento ye que chuzgas tot con ampla ambista: o paso de o tiempo fa que os feitos ocurritos en l’añada se’n beigan más esclateros. De bez, baluras as tuyas ideyas con menos prisas y más equilibrio. Á la fin y á o cabo, encara tiens de margin ta pensar en eras. En ixe ambito, pueden surxir-te ideyas muito buenas. Prexína-te fendo-ne con ilusión.

Pero antimás de pensar en l’esdebenidero, no te xublides en Abiento d’esfrutar o que ya has conseguito, que también bi’n ha.

Ya siga ta pensar en os tuyos balors cristianos, o en a tuya bida presonal, o en a tuya trayeutoria profesional, o en o que quieras…

…biemplegato á l’Abiento

Corona d´Abiento. Fuente: Wikipedia
Corona d´Abiento. Fuente: Wikipedia
Referenzias:
[1] WIKIPEDIA. 8 mar 2014. Aviento. http://an.wikipedia.org/wiki/Aviento_(cristianismo). Consultato 7 dic 2014
[2] WIKIPEDIA. 11 chul 2014. Zierzo. http://es.wikipedia.org/wiki/Cierzo. Consultato 7 dic 2014.