A bezicleta en a ziudá: muito más de o que te prexinas. O caso de Copenague

This post is also available in: Spanish

Dinamarca ye o tipico país emplegato como esemplo cuan se fabla d’aspeutos tan apreziatos como a l’amostranza, equidá en o trestallo de a riqueza, competitibidá, trasparenzia, desembolique sustenible, enerxías esbiellables, democrazia, libertá, condizions laborals… De feito, Dinamarca ocupa posizions destacatas en muitos d’istos deseyatos rankings [1]. En a mía esperienzia d’ibierno en o país nordico he puesto comprobar bels d´istos aspeutos de primer man. Y sí, ye un país de o que se puede aprender muito en istas dembas.

Sin dembargo, d’entre toz os indicadors de normal otorgatos á Dinamarca —en iste caso á la suya capetal, Copenague— bi ha un que por o suyo impauto cuantitatibo y cualitatibo me parixe que estricalla de raso: a bezicleta, o suyo emplego y conzeuto.

A ideya que se tiene en primeras ye que astí a bezicleta s’emplega muito, que ye un meyo muito establexito y que a chen ye abezada á emplegar-la. Y ye berdá. Pero cuan tiens a oportunidá de comprebar-lo á pie de campo, como un usuario más de a bezicleta ta marchar á lo treballo de cutio o desplazar-te por a ziudá por cualsiquer motibo, ye más fázil comprender l’autentico impauto que a bezicleta puede tener ta una ziudá, con Copenague como caso d’analís.

A infografía auto contino —estrayita d‘iste articlo d’un escritor y fotero que se diz Alex Berger, y que m’ha feito goy más que más por o emplego de fuens y referenzias seriosas— resume l’alcanze en lumeros de a bezicleta en a capetal danesa [2]. As feguras son auto-esplicatibas de dica qué punto s’emplega a bezicleta. No ye solo que s’emplegue muito: ye que bi ha prou más bezicletas que abitans, zinco begatas más bezicletas que autos, o 63% de os ripresentans de o parlamén emplegan a bezicleta toz os días ta marchar á lo treballo, más de 400 kilometros de bías urbanas ta bezicletas, l’alto ran de seguranza perzibito por os usuarios…

(…contina dimpués d´a infografía…)

copenhagen_bicycle_figures

Un día cualsiquiera, pasando por un de os prenzipals puens de a ziudá (o de l’azeso á lo bico de Nørrebro), l’oxetibo de l’afoto —un de os muitos que bi ha esparditos por a ziudá— m’informaba que yera o ziclista 14.675 que pasaba por iste punto d’iste diya, y o 624.103 en o que ba d’añada.

CPH_bicycle_totem

O perfir d’usuario de bezicleta ye de toda mena de ziudadans: treballadors y escolanos marchando á diario á lo suyo puesto de treballo/estudeo, chobens bien paratos ta salir una tardi/nuei de cabo de semana, mais y pais lebando á los suyos fillos á la escuela en una cargo-bezicleta u os propios mesaches marchando en bezicleta cuan a suya abilidá ya lo se premite, elegans siñoras y siñors á los suyos destins, carteros fendo o reparto con una cargo-bezicleta adautata y cargata d’imbíos postals,… E isto en os meses d’ibierno, prexina en epocas de l’añada con millor orache….

Iste emplego á toz estrús de a bezicleta ye posible de conchunta con atros dos dembas clau e intredependiens: as infraestruturas urbanas y a conzienziazión de todas as partis intresatas (ziclistas, condutors d’autos, piatons, gubernans de a ziudá).

A bezicleta ye una prioridá en l’urbanismo de a ziudá. O suyo puesto dominán en as infraestruturas puede beyer-se tanto en as prenzipals bías de o zentro de a ziudá feitas asinas dende fa añadas, como en os proyeutos de nueba costruzión pensatos t’asumir as demandas más dexisens de mobilidá presens y futuras. L’espazio publico destinato á la bezicleta ye en muitos casos asimilable u mesmo superior á l’espazio destinato á la resta de beíclos. Sin dembargo, dau a grandaria reduzita y capazidá de maniobra de a bezicleta, a superfizie adedicata á iste meyo en terminos totals fazilita en a prautica un bolumen de transito de grandaria cheometrica. Ye dizir, millor mobilidá por unidá d’espazio urbano disposable: Mobilidá efizién.

Cuan se fabla d’infraestruturas cal parar cuenta de as bías de zerculazión, pero tamién aspeutos colaterals y nesezarios como l’equipamiento, o mantenimién, as regulazions u o propio sistema de trafico. En as siguiens afotos amuestro bels d’istos aparcamiens, semarotos, siñalizazión orizontal y bertical, rampas ta bezicletas t’azeder á esferens rans de a ziudá (puens, trangos inferiors, puestos soterraneos,…)

CPH_bike_infraestructures

CPH_bike_infraestructures_2

CPH_bike_infraestructures_3

CPH_bike_infraestructures_4

A siguién afoto ye muito sinnificatiba porque, antimás de ripresentar bien o emplego á tot estrús de as bezicletas y bels exemplos de as suyas infraestruturas (semafors, marcas bials y regulazión), sirbe ta contrimuestrar o terzer elemén nesezario ta que o sistema funzione: a conzienziazion de os usuarios. En iste caso, puede beyer-se o rispeto de os ziclistas á cadagún de os carrils y direzions de zerculazión, marcatos con a siñalizazión orizontal y bertical.

CPH_bike_infraestructures_5

Pero o rispeto ye de toz os usuarios de a bía publica: ziclistas, condutors de beíclos pesatos y piatons. Un de os intes en os que milllor puede beyer-se l’autitú de os usuarios ye en os “zeda o paso” que fan con una firme pazienzia, prebisión y precauzión os condutors d’autos y atros beíclos. Profés, o ziclista puede estar perfeutamén un amigo, familiar, un fillo,… de o condutor.

Solo con a combinazión d’adecuatas infraestruturas urbanas y conzienziazión de os usuarios, s’alcanza o ran de seguranza y o emplego masibo de a bezicleta que reflexan as estadisticas. Os tres elemens son interdependiens y funzionan en bucle: á más usuarios de bezicleta, más chustificazión ta implantar infraestruturas y más autitú de os ziudadans.

Os risultatos son un benefizio ta todas as partis afeutatas: a ziudá como organizazión y os suyos gubernans, usuarios de bezicletas y atros usuarios de as bías publicas y ziudadans en cheneral. A bezicleta amillora a mobilidá y risuelbe un de os problemas más importans de as ziudaz: a saturazión de o trafico rodato y a poluzión de o meyo ambién. Por ixo, a bezicleta ye un asunto de ziudá, rispaldato desde fa decadas por os gubernans, independientemén de a tendenzia politica. Ta os usuarios de a bezicleta, suposa una disminuzión de tiempo y diners imbertitos en os desplazamiens por a ziudá. Ta toz os usuarios de as bías publicas, a bezicleta ye un meyo de trasporte que fazilita a seguranza bial y no contamina o meyo ambién con rudio ni emisions tosicas á l’atmosfera. Bi ha atros benefizios colaterals: se prautica esport, s’esfruta más de os trayeutos y de a ziudá, se chenera un ambito agradable.

En o contesto autual en que se i troba o mundo, as ziudaz que, como Copenague, apostaron e implantaron un sistema zentrato en ista mena de mobilidá, se’n troban en posizión de autentica bentaxa competitiba. Un caso ta parar cuenta.

Referenzias:
[1] WIKIPEDIA. 27.nob.2015. International rankings of Denmarkhttps://en.wikipedia.org/wiki/International_rankings_of_Denmark. Consultato 26.mar.2016.
[2] ALEX BERGER. Danish Bike Culture Is Even More Amazing Than You Thought. VIRTUALWAYFARER. 11.set.2014. http://virtualwayfarer.com/danish-bike-culture-is-even-more-amazing-than-you-thought/. Consultato 26.mar.2016.