Cuan os retes sozials se’n combierten en una fin en sí mesmos: una error fatal

This post is also available in: English, Spanish

Epic_failM’ha pasato barias begatas dende que emplego Twitter, a zaguera ista mesma semana. Si emplegas iste rete sozial, posiblamén a tú también t’abrá ocurrito: reculles un abiso de que un nuebo usuario ha empeziato á siguir-te; en poco tiempo, te miras a tuya lista de contautos de Twitter, pero astí no bi ha rastro de o nuevo siguidor.
O que ha feito iste usuario ye siguir-te fendo asinas un abiso de que reculles por correyo, u abiso en o mobil o en o tuyo panel de Twitter y, auto contino, dixar de siguir-te de traza anormalmén rapeda, en bels casos sin cuasi haber podito leyer as tuyas publicazions.
Con ista operazión, iste usuario o que consigue ye, como menimo, clamar a tuya atenzión ta que, en una reazión alto u baxo automática empezipizies tú también á siguir-le.
Ye posible que ista mesma azión l’aiga ripitito de traza masiva con muitos atros usuarios con l’oxetibo d’amillorar o ratio entre o lumero de siguidors y o lumero de usuarios á os que en sigue. O puede estar que lo faiga de traza seleutiba ta consiguir que li sigan determinatos usuarios que creye importans.
Siga cual siga l’oxetibo pretendito, ista teunica del “follow-unfollow” no me parixe una buena prautica porque escubre un mal comportamiento, manca d’empatía y torpeza por parti de l’usuario que la mete en funzionamiento.
Ye ista mena d’usuarios con os que t’intresa tener contauto, anque siga á trabiés d’una rete sozial? Desconoxco o ran d’esito d’ista prautica, pero con yo no funziona.
Pior ye encara cuan ista prautica ye feita por as cuentas en Twitter que en pertenexen á interpresas. Y encara más grau cuan se trata d’interpresas de o tuyo seutor profesional, de as que poderbas perfeutamén estar un posible clien. Porque antimás d’una autitú sozial dudosa, poca abilidá y manca total de sensibilidá enta atros usuarios, a interpresa te ye trasmitiendo un mensache:
“a yo rai qui sigas, mesmo un clien; sólo que m’intresa amillorar o lumero d’usuarios que me’n siguen t’amillorar a mía imachen en Twitter á trabiés de un buen lumero de siguidors”
L’efeuto ye de raso contraproduzén: antimás de poco intrés por siguir a cuenta de Twitter d’ista interpresa, ta empezipiar me se quitan as ganas de saper ni sisquiera que ye o que bende.
Pues a pesar d’isto, bi ha interpresas que lo fan. Con istas prauticas m’ha sorprendito bella interpresa distribuidora de materials, consultoría u entidaz de formazión rilazionatas con a mía profesión y con as que poderba contar en bel inte. Bien, pos a rispuesta que merexen por ista traza de presentar-se ye: grazias, pero asinas, no pas.
Twitter, como a resta de serbizios de o Rete, puede estar una gran ferramienta ta determinato intrés (informazión, comunicación, marketing, etz), si se emplega con intelixenzia. Bi ha una linia que desepara una útil ferramienta de bella cosa conbertita en una fin en sí mesma. Teunicas como istas superan esclateramén ista linia.
Una error fatal ta o tuyo nombre personal y, más que más, profesional.