Esquemas de Sustenibilidat y RSC como valura esferenzial y ventacha competitiva

This post is also available in: Spanish

Por David Mairal. 30 de chunio d’o 2017.

En dos meses que levo con o mío nuevo rol como auditor, una d’as oservazions más plateras y rapedas que soi trovando ye a importanzia estratechica que os planteyamiens de sustenibilidat y RSC en han alquirito ta ras organizazions que han eslechito ista mena d’esquemas. No me refiero solo que a l’impauto que a implantazión d’istos sistemas tiene ta ra propia estructura interna d’a organizazión, sino que tamién a ra balura y puesto esferenzial en o suyo respeutibo seutor. En l’autual entorno sozial, normativo y de mercato, as interpresas y organizazions con modelos de sustenibilidat y RSC maduratos se´n trovan en una posizión d’esclatera ventacha competitiva.

A efeutos de conoxedura d’as organizazions, as auditorías funzionan como chicoz estudeos transversals (cross-sectional case studies). Ye dizir, estudeos de caso de curta durada trestallatos en varias fuens de datos (interpresas) que fazilitan una anvista rapeda d’esferens puntos de prozesos superiors (Jankovicz, Farrell, & Wallace, 2016). E ista anvista ye o que se consigue prezisamén al auditar baxo os estandars de sustenibilidat y risponsabilidat sozial, en o mío caso caso GRI-G4 e Initiative Clause Sociale (ICS), inspirata en o standard SA8000.

O simple feito de que una organizazión s’achuste a una auditoría d’ista mena ye, de normal, un esclatero indizio d’una chestión y una estructura desixén con era mesma y competitiva aintro d’o suyo seutor. En Europa y más que más en España, pocas son as interpresas que ue pueden planteyar-se sisquiera sosmeter-se con guaranzia d’esito a una auditoría de sustenibilidat u risponsabilidat sozial. En o caso español, una estructura interpresarial dominata de raso (a ro 99%) por treballadors/as autonomos/as, micro interpresas y chicotas interpresas, no ye o tarabidato ideyal ta establexer ista mena de modelos de chestión prenzipians y enantatos, más aplicables y oportunos ta grans interpresas, d’ambito más que más global y autibidaz d’impauto economico, sozial y meyoambiental importán (“Cifras PYME,” 2017) (“Business economy – size class analysis,” 2015)

Fuen: Ministerio de Economía, Industria y Competitividat
Meyanas, chicotas, grans, microinterpresas, autonomos/as. Fuen: Eurostat

Prenendo como referenzia datos importans como o numero d’informes de sustenibilidat rechistatos por o Global Reporting Initiative (33.828 informes, a Jun.2016) (“GRI’s Annual Report 2015-2016,” 2016) u ro numero d’interpresas zertificatas baxo l’estandar SA8000 (3.799 interpresas, a 29.chun.2017) (“SA8000 Certified Organisations,” 2017), s’oserva que a proporzión d’organizazions baxo ista mena d’esquemas ye radito.

A sustenibilidat y a risponsabilidat sozial son modelos de chestión amplamén apreziatos e reconoxitos por a soziedat en cheneral y os consumidors en particular, por as propias interpresas y organizazions en cheneral, refirmatos y promobitos por a normativa y dezisions en a mayoría de países fortals.

En iste contesto cuantitativo, parixe lochico pensar que as organizazions incorporatas a iste zerclo d’eszelenzia radita deberba esfrutar d’una situazión d’esferenziazión y ventacha competitiva en o suyo seutor, más que más pendiendo d´a suya grandaria e impauto son más raditos (micro, chicotas, interpresas meyanas).

As auditorias, como chicoz pero completos estudeos de caso esploratorio d’as organizazions, confirman ista situazión a un ran cualitativo: casos de chicotas y meyanas interpresas que, en rispuesta u prevision a ro suyo entorno economico, sozial y meyoambiental, se proyeutan enta planteyamiens de sustenibilidat y RSC difízils de veyer en interpresas muito más grans y con estructuras muito más complicatas. Interpresas con una valura esferenzial d’a que ya se’n son benefiziando con respeuto a ros suyos competidors.

Bibliography

Business economy – size class analysis. (2015, November). Retrieved August 2, 2017, from http://ec.europa.eu/eurostat/statistics-explained/index.php/Archive:Business_economy_-_size_class_analysis
Cifras PYME. (2017, May). Retrieved August 2, 2017, from http://www.ipyme.org/es-ES/ApWeb/EstadisticasPYME/Documents/Cifras-PYME-mayo-2017.pdf
GRI’s Annual Report 2015-2016. (2016). Retrieved August 2, 2017, from https://www.globalreporting.org/resourcelibrary/GRI-AnnualReport2015-2016.pdf
Jankovicz, D., Farrell, P., & Wallace, W. (2016). Introduction to Business Research I – The Research Proposal. Edinburgh: Edinburgh Business School, Heriot-Watt University.
SA8000 Certified Organisations. (2017, June 29). Retrieved August 2, 2017, from http://www.saasaccreditation.org/certfacilitieslist.htm