#Imbestigazión: influyenzia de a #teunoloxía de o #conoximiento en a funzión #sustenible de as organizazions

This post is also available in: Spanish

Lebo barias semanas treballando en o proyeuto de o M.B.A. en o que soi alpunta-to. As zagueras semanas, firme capuziato en o Treballo o cualo, antimás, me sirbe ta chustificar a ebidén baxata que puedes beyer en o ritmo de publicazions en o blog en os zaguers tiempos. Á partir de chunio, aspero retomar o suporte que proporziona o blog a lo mío treballo de contino.

Bueno, á lo tema. A lo proyeuto li manca encara prou ta estar rematato, pero tiene ya establexitas as suyas linias mayestras, a suya chustificazión, a metodoloxía y as prenzipals fuens de documentazión.

O Treballo se tetula “Influyenzia y aplicazión de a teunoloxía de o conoximiento en a funzión sustenible d’una organizazión”. Talmén no siga o tetulo definitibo pero sí que, a priori, da una pista de o planteyamién: teunoloxía d’informazión  y comunicazión, chestión de o conoximiento y funzión sustenible de as organizazions.

Strategy

A chestión d´o conoximiento y muito espezialmén, a suya ambista teunoloxica ha estato amplamén estudeato, desembolicata y establexita con esito en as organizazions en as zagueras quinze añadas (Provost&Fawcett, 2013)

Dica agora, ista aplicazión de o conoximiento, alazetato en a teunoloxía, ha estato dirixito más que más á las dezisions finanzieras, de marketing y de as interpresas de furnidura y lochisticas. Una de as razons d’isto, ha estato a esistenzia de grans cantidaz d’informazión sobre istas fainas que as organizazions han estato almazenando en formato dichital dende que a teunoloxía asinas lo ha feito serbir. En ista situazión, alchuntar a informazión esistén en formato dixital á os nuebos retos teunoloxicos que ban aparexendo ye o más simplo.

No pas olcurre o mesmo con atras fainas aintro de as organizazions -entre as que se’n troban o desembolique sustenible– que, por esferens enchaquias, han íu establexendo os suyos meyos y fendo os suyos rechistros en formatos escasamén dixitalizatos, recurrindo prenzipalmén á lo suporte fesico, á lo papel.

Ista situazión tiene barias enchaquias. Una ye a propia inerzia en l’emplego de o papel como suporte y a dificultá de surtir de a zona de comodidá esistén en as organizazions (Dans, 2012 y 2015); pero tamién se’n alchuntan atros fautors como os requisitos almenistratibos, legals y mesmo estandars de chestión de reconoxito prestichio de os que penden determinatas funzions en as interpresas, y que han dificultato o cambeo a formatos dixitals de a informazión creyata y recopilata, quedando descolgatos de o exemplo teunolochico y de as suyas bentaxas.

En ista situazión d’espenche y desbenchaxa teunoloxica se’n troban prezisamén una firme cantidá de dembas pertenexiens a lo desembolique sustenible de as organizazions, espezialmén a chestión de os suyos aspeutos meyoambientals (GRI, 2013)

Parando cuenta d’iste contesto, o Treballo pretende estudear a influyenzia y aplicazión de a chestión de a conoxedura, incluyendo a suya demba más teunoloxía (aplicazions, prauticas, teunicas, ferramientas, recursos) también en o desembolique sustenible de as organizazions, de traza que s’enample a cantidá y calidá de os criterios de sustenibilidá alchuntatos á os prozesos de presa de  dezisions de as organizazions.

Con o Treballo se pretende:

  • estudear os zaguers enantes en a chestión de o conoxedura, más que más de a suya demba teunoloxica, que cal parar cuenta á ran direutibo y de responsabilidá en a presa de dezisions estrateuchicas d’una organizazión;
  • estudear o desembolique sustenible de as organizazions y os suyos criterios de medizión dende o l’ambista de os estandars más amplamén reconoxitos, más que más as guías G4 de o Global Reporting Initiative;
  • imbestigar l’aplicazión sobre a chestión de a sustenibilidá, ferramientas, teunicas, prauticas, aplicazions y planteyamiens de alazet prenzipalmén teunoloxico pertenexiens á la demba de a chestión de conoxedura, ya contrastatas en atras funzions de as organizazions;
  • amostrar barios esemplos prauticos aplicatos á belún de os 91 indicadors d’impauto (GRI, 2013) u a bels aspeutos de chestions de o desembolique sustenible en cheneral d’una organizazión.

Consiguindo os ochetibos parzials nombratos, en zaguer termino se pretende contrimostrar cómo una chestión de a sustenibilidá alazetata en as posibilidaz que fazilita a teunoloxía de a conoxedura, puede enamplar a cantidá y calidá de os criterios de sustenibilidá incorporatos á los prozesos de presa de dezisions y alportar una balura adubita á la organizazión.

Como digo, o Treballo tiene un componén d’imbestigazión, con o que se pretende trazar o binclo entre a chestión de a conoxedura y o desembolique sustenible de as organizazions. Más concretamén, un prozeso d’imbestigazión ta trobar (Enserink et al., 2010) o impauto y aplicazions autualmén esistens de o primer (conoxedura) sobre o segundo (sustenibilidá), más que más sobre os 91 indicadors d’impauto (GRI, 2013) establexitos en as guías ta informes de sustenibilidá de o Global Reporting Initiative.

Aspero trobar iste benculo, o cualo alportarba grans benefizios colaterals á asabelas dembas de meyo ambién y, más que más, a la seguranza y salú incluyitos en o desembolique sustenible de as organizazions. Os indizios parexen positibos cuan o el propio GRI opina que cal “ir-ie más dillá de los simplos informes y zentrar-se en la informazión chenerata en o prozeso de reporte de a sustenibilidá”

Continaré informando de os enantes y, si surte un treballo azeutable, talmén publique bella cosa de o mesmo.

Bibliografía:
DANS, Enrique (2012). Indicadores del fin de la era del papel. El blog de Enrique Dans. https://www.enriquedans.com/2012/12/indicadores-del-fin-de-la-era-del-papel.html. Online. Consultato 28.d’abr.2016;
DANS, Enrique (2015). Sobre comunicación corporativa. El blog de Enrique Danshttps://www.enriquedans.com/2015/09/sobre-comunicacion-corporativa.html. Online. Consultato 28.d’abr.2016;
ENSERINK, Bert, HERMANS, Leon, KWAKKEL, Jan, THISSEN, Wil, KOPPENJAN, Joop, BOTS, Pieter (2010). Policy Analysis of Multi-Actor Systems. The Hague, NED: Uitgeverij LEMMA;
PROVOST F. & FAWCETT, T. (2013). Data Science for Business, What You Need to Know About Data Mining and Data-Analytic Thinking. 1ªed.. Sebastopol, CA: O´Reilly;
GLOBAL REPORTING INITIATIVE (2013) GRI G4 part 2: implementation manual. https://www.globalreporting.org/resourcelibrary/GRIG4-Part2-Implementation-Manual.pdf. Online. Consultato 28.d’abr.2016.

Leave a Reply

Your email address will not be published.

*