Os cambeos en a mentalidá de a chen ta aprofeitar a teunoloxía

This post is also available in: English, Spanish

O bierner pasato, 11 de chulio, o Climate CoLab del MIT (Instituto Teunoloxico de Massachusetts) ufrió un seminario sobre un posible sistema de bosos o mercato d’emisions de carbono ta Estatos Unius.

O seminario estió en direuto, á trabiés de a web (un “webinar”, termino aparexito de o ligallo de “seminario” + “web”) y ye un atro exemplo de o componén umán que amenista o Rete ta consiguir probeito de as aplicazions y serbizios que ban aparixendo.

Más que más, presonas

En a prautica, o webinar consistió en un intercambeo de demandas y rispuestas entre tres ripresentans d’istituzions en o tema enerxetico en Estatos Unius, moderatos por un miembro del MIT Climate CoLab.

Os que siguibános o seminario en direuto á l’atro costao de a pantalla, beyébanos bella cosa asinas:

webinar
P. Shultz (antigo Secretaire d’Estato) y dos ripresentans d’organizazions americanas de enerxía, Bob Inglis (partito republicán) y Philip Sharp (partito democrata). Moderatos por Laur Fisher, de o Climat CoLab

O mesmo que pasa con l’amostranza á distanzia o as conferenzias emititas en direuto dende Bruselas, iste seminario no ye teunicamén mica orixinal: camaras de bideo, microfonos, o Rete de banda ampla y un programa ta retrasmitir a charrada.

O que sí ye orixinal y que reyalmén mete en firme balor os enantes de a teunoloxía, en o Rete en iste caso, ye l’autitú con que se’n asumen, que da como risultato cosas como:

  • unibersidaz y alunnalla en tot o mundo compartiendo conoximiento, como en o caso de l’amostranza unibersal y ubierta;
  • organos y ripresentans publicos, amostrando a lo ziudadán de traza trasparén y democratica cómo os comisarios europeyos esponen as grans politicas y cómo as collas de treballo discuten cómo se prenerán as grans dezisions;
  • o, como en o caso del webinar de o Climate CoLab, que puedas beyer, ascuitar y mesmo interautuar con tres altos ripresentans d’organizazions alazetals en materia enerxetica de Estatos Unius, que son con toda confitanza en o cambra d’estar de a suya casa o en “a cambra de l’ordenador”, con una naturalidá de raso que te fan sentir más prosimo á ers que si los estieses ascuitando fablando dende un atril á un auditorio de ziens de presonas.

Compartir, trasparenzia y democrazia, confitanza y naturalidá…

…bella cosa que beyer con a chen