Panels solars y baterías d’Ikea: punto d’inflesión d’as enerchías renovables de consumo

This post is also available in: Spanish

15 d’agosto de 2017 Por David Mairal.

Fa bellas semanas, Ikea lanzó o suyo nuevo sistema domestico de panels solars e almazenamiento por baterías. Al parixer, o sistema d’Ikea no parixe aportar cosa revoluzionaria a lo sector d’as esbiellables en terminos de tecnolochía u formulas de finanziazión. O factor esferenzial d’a notizia ye en a simpla incorporazión de sistemas domesticos, autonomos d’enerchía a l’esitoso conzeuto de producto, diseño senzillo y pre azesible que caracterizan a Ikea. Un feito que puede marcar significativamén o modelo enerchetico d’as casas nuestras.

Sistemas solars bi’n ha muitos dende fa tiempo, cada vegada más efiziens tecnolochicamén e rentables economicamén (Dans, 2015). Con mayor u menos complexidat, se’n pueden veyer instalatos en muitos puestos: edifizios nuevos con os zaguers avanzes, cabanas basicas en l’atra punta d’o planeta, mesmo personas movendo-se por o mundo en bizicleta. A ufierta de kits de chenerazión e almazenamiento d’electrizidat ye anguniosa, e azeder a un sistema adecuato puede estar senzillo.

Sin dembargo, fren a iste eszenario favorable, encara esisten entrepuzes d’entrata que en son privando l’azeptazión d’istos sistemas a ran domestico. Antiparti de l’entorno lexistativo/regulatorio establexito en muitos países, que chenerosamén se puede calificar como increyible (iste ye tema ta tratar aparti) o zierto ye que, dica agora, os sistemas disposables tamién en tienen bella dificultat en l’inte d’o suyo calculo, instalazión u mantenimiento. Ta eslexir, instalar e mantener un sistema d’ista mena s’amenista conoximiento e abilidaz que no todas as personas en tienen, y cal contar con os espezialistas, con tot o que isto suposa (augmento d’o pre…). Antimás, dica l’aparizión d’as baterías de Tesla, os sistemas d’almazenamiento risultaban masiato fozíns e perigrosos como ta integrar-se bien en muitas casas.

Fueras de l’entorno lechislativo, o kit solar d’Ikea puede risolver parti d’istos buedos:

  • estar asequible a la mayoría de casas;
  • estar senzillo d’eslexir e integrar en as casas;
  • un sistema escoscato, de fázil mantenimiento, y emplego seguro.

Por l’inte, o sistema d’Ikea ye disposable solo en UK, pero a visión de panels solars, baterías en as casas nuestras e lo conzepto en cheneral d’a enerchía, estarán esferens cuan los ne veigamos en o benién Catalogo d’Ikea. A sensazión de que se podrá tener una instalazión d’enerchía solar en casa nuestra, con a fazilidat parellana a montar una librería Billy. Un punto d’inflexión que puede azelerar a endrezera enta un modelo enercheticamén más sustenible, manimenos as entrepuzes que bellas personas meten.

Bibliography

Dans, E. (2015). Las perspectivas de la energía solar y la ley de Swanson. Retrieved November 6, 2017, from https://www.enriquedans.com/2015/07/las-perspectivas-de-la-energia-solar-y-la-ley-de-swanson.html