Tú qué yes, periodista u espezialista?

This post is also available in: English, Spanish

L’atro día tenié una charradeta con a mía amiga y compañera bloguera Cristina Arquilé (Ensalada Ilustrada), sobre un contino debat sobre a creyazión de contenito, en iste caso, en un blog:

ta creyar y chestionar contenito en una bitacora de tematica concreta, qué perfil ye millor, o d’un periodista o d’un espezialista?

Aunque ye a tipica demanda que no tiene una rispuesta concreta adautable á toz os casos, boi á arriesgar-me á la fin d’iste post con o que creigo que ye o millor equilibrio de os dos perfils ta un blog espezializato.

Nota: fablo de "perfils" en un sentito "d'abilidaz" alquiritas, ta no asoziar-los esclusibamén con tetulazions academicas concretas. Ye dizir, abilidaz alquiritas por meyo d'asabelas posibilidaz que bi'n ha güe á disposizión de tot o mundo: cursos presenzials y formazión contina tradizional, programas d'amostranza en a Rete, o conoximiento alquirito de traza autodidauta, os consellos que te puede dar un amigo en o bus camín de o treballo, a propia prautica u a capazidá natural que tiene cada presona t'asimilar determinatas autituz.

Por un costau ye o perfil periodista

Ebidentemén, desembolicar iste perfil ye o más simplo comenzipiando por una formazión academica rilazionata con isto (periodismo, zienzias de a informazión, comunicazión,….)

Si antimás, o blog en custión trata sobre beluna de as materias rilazionatas con ista amostranza -como pueden estar as umanidaz, zienzias sozials, istoria, política, economía, ezetera, -o perfil periodista tiene toz os fautors á lo suyo fabor ta estar tamién espezialista.

O dominio d’istas abilidaz fazilita:

  • dende o punto de bista formal, que o contenito creyato siga l’adecuato, bien estruturato y redautato, que os post sigan “redondos”,…. bien escritos en resumen;
  • dende o punto de bista de a chestión, que o contenito siga publicato y espardito en os intes y ambitos correutos, que a rilazión con os autors emplecatos siga bien canalizata, que se tienga una ambita estrateuchica y a largo plazo de o contenito de o blog.
En una parola: abilidaz ta la comunicazión.

O perfil espezialista

Ye muito alazetal: sin un dominio de raso d’una materia concreta, no se puede fablar de blog espezializato.

Anque o contenito publicato cal que alchunte bels criterios de comunicazión menimos, a responsabilidá teunica ye a que fa de o blog una fuen segura d’informazión sobre determinato tema y, a largo plazo, que alquiera o prestichio entre a comunidá.

A partir d’astí, cuanta más capazidá de comunicazión se tienga, millor. Pero si bi abese que considerar o perfil periodista y o perfil espezialista d’un blogger en una bitacora de tematica muito espezializata -y astí ba a mía balorazión-, yo fería d’iste trestallo:

20% perfil periodista – 80% perfil espezialista

En o caso de a mía amiga Cristina, talmén ista proporzión siga esferén, ya que era alchunta una amostranza periodistica espezializata en a tematica que trata o suyo blog, periodismo gastronomico de carauter rural y tradizional.

En o mío caso, me limito á lo trestallo 20-80 que he meso antis, habendo tenito que fer-me o pre ta consiguir ixe 20% de perfil periodista menimo nesezario.

Y tú, que trestallo ferías?