Por cosas asinas me fa goy Europa

This post is also available in: Spanish

etui_conference_banner_300x150_mediumMaitin marcho ta Bruselas, an bi seré dende o 4 dica o 6 de marzo en a Conferenzia Intrenazional “Treballo y Salú en a muller”, organizata por l’Istituto de Sendicatos Europeyos (European Trade Unión Institute, ETUI).

Sobre a Conferenzia y os aspeutos tratatos en os esferens autos programatos á os que bi acuda escribiré en os siguiens posts istos días. En ista dentrata quererba dixar ebidenzia de a tremenda predisposizión que esiste en asabelos organismos europeyos ta la partizipazión de os ziudadans y protagonistas embrecatos en as aizions que se’n programan. A Conferenzia de o ETUI ye o zaguer esemplo con o que m’he trobato.

Como en os zaguers casos, he azedito á l’auto gracias á lo blog. Fazié a demanda de rechistro replenando un formulario d’azeso publico en a propia web de l’ETUI. De bez, aporté una simpla descrizión de l’autibidá que desembolico en o blog y demandé fazilidaz ta poder azeder á la Conferenzia.  En poquers días me’n confirmón o rechistro á l’auto e dimpués, l’azeutazión de os gastos de trasporte (buelo de marchar y tornar  Bruselas-Barzelona) y l’alox ta os días de a Conferenzia en un otel de o zentro de a ziudá.

Pero por denzima de as condizions y fazilidaz d’azeso que en cada caso podiesen consiguir-se, o que más me clama l’atenzión ye a dedicazión, rispeto y trasparenzia con que os organismos europeyos tratan cada demanda, se trate d’una gran organizazión u d’un simplo ziudadán con un chicot blog, como ye o mío caso.

En as zagueras añadas, m’he enfilato en barias ocasions á esferens entidaz europeyas por dibersas enchaquias. En bellas ocasions as rispuestas a las mías consultas estión afirmatibas y en bellas atras no pas. Pero de cutio, de cutio, a rispuesta que he recullito de l’organismo europeyo en custión ha estato una contrimuestra de rispeto y trasparenzia; a sensazión de que o tuyo caso ha estato estudiato con a dedicazión que se merexe.

Ista ye a mena de cosas por as que me fa goy Europa.