Bels topicos esmontatos y confirmatos sobre Dinamarca.

This post is also available in: Spanish

Ha pasato más d’un mes, dende que i plegué á København —como se diz en danés— á treballar en o proyeuto de l’ARENACPHX.

Pasar una temporada alto u baxo larga en Dinamarca, lexos d’un alox tipo “besita turistica”, te premite tener una amuestra ampla de muitas dembas de a bida astí. Por amostrar-lo en poquers detalles: combibo en un piso con una parella de daneses, ta subsistir foi de normal a merca en o super que ye al canto, me muebo en bezicleta de traza cuasi ya de raso y no dixo propina en tabiernas y restaurans.

D’ista traza, no sólo que i beyes o que aparixe en as poeticas guías de biache, as marabiellas danesas que se’n rezentan en os programas d’espardidura de as telebisions de o sur d’Europa u en as sentenzias de os tuyo cuñau de as zagueras nabidaz. Sí, de seguras tot ixo ye zierto, pero tamién lo son bellas atras cosas que no se’n rezentan ni en as guías de biache ni en os programas de tb, simplamén porque esferban bels de os suyos argumens. Fote! Y me fa goyo parar cuenta d’istas cosas por yo mesmo.

En ista dentrata, boi á zentrar-me en tres aspeutos de os que, d’astí á un mes, tiengo ya preba y que contradizen —u a lo menos no pas confirman— os prechuizios con os que i plegué.

Fa fredo, pero no guaire más que en Aragón

Dinamarca: país nordico, Escandinabia, o zerculo artico, os campos de futbol chelatos y nebatos que se beyeban en as miticas retrasmisions telebisibas de partitos europeyos contra collas daneses (Brøndby, Aalborg, o Odense, F.C. Copenhagen,…)…

Sí, tot ixe ye berdá, pero tamién o que ye Dinamarca ye o país más a lo sur d’Escandinabia, que o país ye incluyito en o zerculo polar por Groenlandia y que as collas danesas de futbol no gosan plegar guaire lexos en as competizions europeyas, asinas que ye normal beyer-los chugar en meses fredos que á partir de marzo, que ye cuan se chuegan as fases importans de os torneus.

A primera semana que i plegué fazió fredo y bi eba una importán cantidá de nieu que duró bels días, pero cosa que no se conoxca por esemplo en cualsiquier lugar altoaragonés u de Teruel.

Istas son as temperaturas masimas y menimas rechistratas ta Copenhagen en chin.2016 en o portal Accuweather:Imágenes integradas 1CPH_temp_ene_2016

A bida ye más cara que en España, pero no guaire

As redoladas turisticas y os negozios ubiertos á lo publico en o zentro de Copenhagen son caros, prou más que en España. Por esemplo, en istas redoladas ye asaber que complicato minchar un menú completo (primer y segundo plato, postre, café) por menos de 40€-50€ en un restaurán normal. Tamién ye normal bosar en istas redolatas alto u baxo 4€ por un café con lei u 8€ por una biera Carlsberg. O menú de 8-12€ no pas esiste.

D’ista traza, una besita turistica sin fer eszesos puya fazilmén de os 100€ a lo día.

Sin dembargo, ista esferenzia en os prez ye muito menor cuan se fabla de produtos de consumo tipicos de a zesta de a merca.

Por esemplo, en o zentro comerzial más zercano a lo puesto an i bibo, un litro de lei entera tiene un pré de 0,80€, un pan de ½kg lo merco por 1,34€, o zaguer queso que merqué (400 grs. de queso de calidá normal) me costó 2,08€, un rampallo gran d’ugas (talmén 400 o 500 gramos) me costó 1,61€, una ensalada “iceberg”, 1,21€. A carne sí que ye prou más cara —toda mena de carne (tozín, pollo, betiella…)— mesmo o dople. O pré a lo cambeo autual Corona danesa-Euro de a gasolina 95 en una estazión de serbizio normal ye 1,30€/litro y o lo diesel, 1,05€/litro. Ista afoto ye de fa bels diyas:

CPH_petrol_station

En bels casos, determinatos serbizios en son más baratos en Dinamarca que en cualsiquier ziudá española. O más esclatero ye a furnidura domiziliaria d’eleutrizidá, que ye más barata que en España. O trasporte publico en Copenhagen ye alto u baxo un 25% más barato que en Barzelona.

A la fin, lebando un estilo de bida normal, en o tema de prez no soi notando tampoco no una firme esferenzia.

A bezicleta, con candau

A lo tema de a bezicleta li adedicaré un articlo antiparti porque o suyo impauto en o trafico, o urbanismo, a poluzión de a ziudá, o estilo de bida saludable de a poblazión me pienso que asinas lo merexe.

Sin dembargo, bi ha un tema rilazionato con a bezicleta que perchudica en bella mida o suposato comportamiento zibico de a soziedá danesa. Se trata de o furto de bezicletas. As estadisticas dizen que cada día se’n furtan en Dinamarca bellas 200 bezicletas. Chugando con ista estadistica, toca á un furto feito por cada seis daneses. Sin dembargo, ista zaguera intrepretazión de alchudicar furtos de bezicleta á un de cada seis daneses, ye un simplo trestallo cruel de os datos que no me pienso que siga ni zierto ni chusto. En cheneral, son chen muito educata y agradable.

Siga como siga, o que ye esclatero ye que en Dinamarca te pueden furtar a bezicleta. Güe, de o trayeuto dende o zentro á lo piso an i bibo en os arredols de CPH, he beyito dos bezicletas esfeitas y tiratas en o un parque, esclateros indizios de furto. Á una de as presonas con as que comparto o piso l’han furtau zinco bezicletas dende que emplega iste meyo de trasporte ta mober-se por a ziudá. Rariza ye a bezicleta que no ye asegurata con un candau. O comentario de cutio de que en Dinamarca puedes dixar a bezicleta en a carrera sin de ligar, ye berdá a meyas: profés que la puedes dixar, pero corres o perigro enamplato de que la te furten.

Yo, a de yo, la ligo.

Y con tot y con ixo, se sape que s´emplegan toda mena de trazas de furto, bi encluyendo…

CPH_bike_locker