Chen bibiendo (cuasi) de raso difuera de o sistema

This post is also available in: English, Spanish

Dende fa un tiempo sigo un portal que se dize Off-Grid (“difuera de a rete“, de furniduras se repleca, más que más de a rete eleutrica). Off-Grid se presenta asinas:

“Off-Grid ye un mezclallo ecleutico de consellos prauticos, notizias de o mundo coneutato á las retes de furniduras y asuntos que pocas begatas esparden os meyos de comunicazión chenerals. (Off-Grid) Promoziona á las muitas interpresas que treballan por un esdebenidero sostenible. Fa campañas sobre temas que intresan á la chen que vive o treballa difuera de a Rete […].

Queremos beyer un desembolique independién de as grans retes en as ziudaz y en o meyo rural ta que os zientos de mils (de presonas) que quieren bibir d’ista traza sigan libres ta fer-lo”

Antiparti d’isto, o portal arrocla una mica dispreziable comunidá de chen que bibe o quiere bibir difuera de as retes de furnidura. Astí bi ha un mapa con os rechistratos en o portal en tot o mundo. En a probinzia de Teruel, por exemplo, bi ha una comunidá rechistrata y yo tamién m’he rechistato como miembro que quiere desconeutar-se de a rete.

off-grid

No bi ha datos ni exautos ni autualizatos, pero bellas estimazions estraofizials que se pueden considerar seriosas fablaban que en o 2007 en os Estatos Unitos poderba bi aber bellas 250.000 casas bibiendo aparti de as retes publicas de furniduras.

Datos y comunidaz en a Rete aparti, a ideya ye seriosa.

Cal aclarar que o conzeuto off-grid no quiere dizir bibir deseparato de o mundo, ni sisquiera de o sistema. A lo menos asinas lo repleco yo. Off-Grid ye una reazión á cómo ye organizata a furnidura de serbizios alazetals (augua, eleutrizidá, comunicazions, bibienda,…) que recullen os ziudadans de tot o mundo, controlato por grans lobbies que en autuan á toz os rans, globals y en toz os seutors economicos.

A iniziatiba esca a espardidura de as fuens d’enerxías renobables y o emplego y trestalle razional de os recursos. Ye dizir, un desembolique más chusto y sostenible.

Pero aparti d’una elezión indibidual por una mena de bida determinata, o que reyalmén da o suporte nesezario á istas iniziatibas son dos fautors imparables: o cambeo climatico que ye sofrindo o planeta y os enantes teunoloxicos.

Güe son comunidaz chicotas e iniziatibas estraordinarias, pero, poquer á poquer, cada begata imos á estar más os que baigamos saliendo de o sistema, á lo menos tal y como ye autualmén configurato. A lo tiempo.