Esferenzias entre zitar y parafrasear; referenzia, bibliografía y plaxio

This post is also available in: English, Spanish

Cuan creyamos bella cosa -un informe o articlo teunico, una obra literaria, una pintura o afoto, o que siga, -á ormino recurremos á lo treballo d’atras presonas como suporte, fuen d’informazión u ispirazión.

scriptoriumPor exemplo, al redautar un documén podemos recurrir á fuens esternas que mos pueden aduyar d’asabelas trazas, (datos, imachens, ideyas…). De bez, ta otorgar a reconoxedura á l’amo de a fuen que hemos emplegato, esisten barias ozions entre as cualas caldrá que eslixamos e encluyir os debidos creditos en bel puesto de o nuestro documén.

Reconoxer o treballo de a resta ye muito importán pero, cal almitir que no se gosa dedicar tot o tiempo y rispeto que merixe.

Por ixo, iste ye o nesezario post-resumen sobre as esferens trazas en que recurrimos á atros treballos y de cómo podemos esprisar en a nuestra obra a reconoxedura á la fuens que hemos emplegato.

Una aclarazión: iste post-recordanza se refiere a lo caso concreto de creyazión de documens de carauter teunico (informes, estudeos, risultatos d'imbestigazión, articlos, posts en blogs).

Zitar, parafrasear y suporte ta os tuyos argumens.

A esferenzia entre zitar y parafrasear ye más formal que atra cosa.

Cuan emplegamos as parolas literals d’atro autor, somos fendo una zita e ísta irá entre cometas “bla…bla…bla…fin de a zita”.

Sin dembargo, cuan mos referimos á bella ideya ya esitén, pero emplegamos as nuestras propias parolas ta esprisar-la, somos parafraseando.

Pero muitas begatas -en o mío caso a mayoría de as begatas- emplegamos os treballos d’atras presonas como suporte cheneral a los nuestros propios argumens, sin de zitar u parafrasear espresamén parolas u ideyas concretas.

Referenzias, bibliografía y plaxio.

Ta reconoxer o credito correspondién á lo treballo d’atras presonas que hemos zitau, parafraseato u emplegato como suporte, en o nuestro documén cal que incluyamos una lista de referenzias y una sezión de bibliografía.

Bi ha muitos metodos y estilos ta desembolicar as referenzias y a bibliografía y con l’aparizión de a Rete, as posibilidaz s’han multiplicato. Pero asti boi á referir-me á un estilo clasico de fer-lo y que ye o que me planteyo emplegar d’agora entadebán en o blog.

Una referenzia reculle os datos identificatibos de a fuen concreta que hemos emplegato ta zitar u parafrasear. Cada referenzia puede ir auto contino de a zita u frase parafraseata entre parentesis y/u formar partir d’una lista lumerata de referenzias [1] [2] [3]… á la fin de o nuestro documén u a la fin d’una paxina u sezión de o mesmo.

Istos son bels modelos de referenzias:

Á un articlo d’un papel:

[1] APELLITO. Nombre. Calendata de l’articlo. Tetulo de l’articlo. Puesto de publicazión. Nombre de o papel.

Á un libro:

[2] APELLITO, Nombre. Añada de publicazión. Tetulo de o libro, edizión. Editorial. Paxinas de referenzia.

Á lo contenito d’una paxina web:

[3] NOMBRE DE O PUESTO. Calendata de l’artíclo. Tetulo de l’articlo. Adresa URL. Calendata de a consulta.

A bibliografía ye a lista de documens que hemos zitato, parafraseato u consultato como fuen cheneral ta dar suporte á la nuestra obra. Por o tanto, a bibliografía contendrá totas as fuens de consultar que hemos emplegato. A bibliografía gosa estar á la fin de a nuestra obra.

Istos son bels modelos de bibliografía tipo:

Á papels y rebistas:

NOMBRE D’A PUBLICAZIÓN. Tetulo de l’articlo. Calendata de l’articlo.

Á un libro:

APELLÍU, Nombre. Añada de publicazión. Tetulo de o libro, edizión. Editorial.

Á una paxina web:

NOMBRE DE O PUESTO. Calendata de l’articlo. Tetulo de o libro. Adresa URL. Calendata de a consulta.

Como digo, ista ye una traza entre muitas obras d’encluyir referenzias y bibliografía. En cualsiquier caso, o importán ye que quede perfeutamén identificato o treballo.

Cuan s’emplega o treballo d’atra presona y no s’otorga a correspondién y correuto reconoxedura, o treballo risultán ye un plaxio e isto mete en duda a solbenzia -en o sentito más amplo de a parola- tanto á la obra como a lo suyo autor.

Asinas que, anque de cutio meto os enlazes ta cada fuen que consulto, á partir d’agora antimás colocaré as referenzias y/o bibliografía que corresponda en cada post, empezipiando por iste.

Bibliografía
DELTF UNIVERSITY OF TECHNOLOGY. 2014. Information literacy 1. http://tulib.tudelft.nl/publishing/how-to-cite/. Consultato o 15 d' setembre de 2015.