A mía esperienzia dimpués de 6 meses de teletreballo freelance

This post is also available in: English, Spanish

Fa cuasi un par de semanas, se cumplioron seis meses dende que establexié a mía autibidá profesional baxo o m’amplo conzeuto de “freelance”.

O mío treballo ye relazionato con a chestión d’interpresas en as arias de sostenibilidá, meyo ambién, risponsabilidá sozial y seguranza laboral. Como iste post no ye un publireportache sobre as mías abelidaz profesionals, te remito direutamén á la pachina web de a mía interpresa por si quiers saper en detalle a qué m’adedico y, si t’intresa bella cosa de o que foi, a la tuya disposizión y de a tuya interpresa i soi.

“O treballo no ye un puesto ni un tiempo; ye una autibidá”

En a prautica, foi o mío treballo dende o puesto en o que ubro l’ordenador y tiengo disposable una conesión á o Rete. De contino, treballo dende l’estudiet que tiengo adedicato en mía casa en Mataró (Barzelona); también dende a casa de a mía parentalla en Ontinar (Zaragoza), an i marcho barios días á lo mes. Y, de cabo cuan, dende puestos improbisatos an i poder enchegar l’ordenador y coneutar-me á lo Rete, ya siga por meyo de bel rete wi-fi disposable á trabiés de a conesión de o telefono mobil, si cal.

Respeuto á l’orario, tiengo establexitas bellas rutinas de o treballo cutianas, semanals y mensuals. Á partir d’iste alazet, pueden surxir determinatas fainas en un orario tan improbisato como o lugar de treballo á lo que me referiba en o zaguer párrafo.

Por istas enchaquias, o mío treballo  “no ye un puesto ni un tiempo; ye una autibidá”.

Ista traza de treballo no ye espezialmén estrania ni escubridora. Dende fa añadas, profesionals d’esferens dembas treballan dende casa suya o puestos remotos y entregan os suyos treballos rematatos. En l’escomenzipie yeran casos rarizos pero, poquer á poquer, ista traza de treballo se ye tornando cada begata más común: as teunoloxías de a informazión y comunicazión son acotolando as barreras de dentrada tanto, que mesmo autibidaz profesionals ultra reguladas -como a de yo-, tiene posibilidaz de desembolique baxo ista formula.

Una traza de treballo sostenible

Cal dizir que, fueras d’iste planteyamiento que parixe simplo, quitar t’adebán ista autibidá puede estar tan difízil u mesmo más que cualsiquier atra. Toz competimos en o mesmo (esfeito) terreno de chuego y as formulas machistrals en son á la man de no guaires. Yo no soi un de os elexitos. Por ixo, o camín ye duro.

Antimás, pende de a presonalidá de cadagún/a, treballar más aislato, sin de superbisión ni orario, puede fer o treballo encara más complicato. Por ixo, antiparti d’una buena planificazión y costanzia, a traza d’estar de cada persona ye un fautor importán. Tiengo suerte en ixe aspeuto.

Sin dembargo, antiparti d’istas esbentaxas, ista traza de treballo tiene bellas cualidaz que la fan muito competitiba y atrautiba ta yo.

1. Definizión de treballos y confianza.

En un planteyamiento de treballo difuera de as instalazions, de l’orario y de o control presenzial por parti d’una interpresa, os indicadors de o rendimiento de o tuyo treballo cal que sigan muito concretos, y que bi sigan unitos a l’autibidá feita, á lo treballo entregato drento de os modelos y condizions alcordatas.

Esisten muitos sistemas ta controlar y medir l’adedicazión (en oras) u lo puesto cheografico d’un treballador, mesmo en puestos remotos, pero recurrir á istos ye un muito mal sintoma. Una definizión de o treballo como a que puede aparixer en un achuste “por cuenta allena” ye masiato dudoso. No pas sirbe .

En puesto d’isto, un definizión completa de o treballo á entregar ye l’alazet de a confianza mutua con a interpresa que achusta os tuyos servicios. Cuan más esclaters y simplos queden dende o primer diya os criterios á cumplir por un treballo, menos malentenditos y más probeitosa estará a rilazión con a interpresa.

A partir d’ista confitanza tan alazetal como fortal, pueden costruyir-se grans acuerdos.

2. Aforro de gastos… y de tiempo

Anque treballes dende casa, bels desplazamientos continan estando nesezarios ta fer determinatas autibidaz, como ispezions y treballos en as istalazions de a interpresa, asistenzia u partizipazión en chornatas, congresos, cursos de formazión, presentazions,… En tot caso, se trata de desplazamientos feitos de cabo cuan.

Bi ha atras situazions que o rete fa más posibles, por esemplo chuntas por bideo conferenzia (con Skype) con presonas con as que ye más complicato trobar-se, u asistenzia a cursos y chornatas desembolicatas en puestos luengos que se pueden siguir en direuto á trabiés de o Rete.

Sin dembargo, a mayor parti de os desplazamientos cutianos -ida y tornata á lo zentro de treballo- no cal fer-los. Mesmo en o caso de treballar en ziudaz con trasporte publico disposable, somos fablando d’una cantidá que de normal plega a 100€ a lo mes.

Antimás, caldría adubir o gasto en birolla en un restaurán, u lo tiempo y molestias que suposan lebar-te a chenta feita en casa tuya.

En resumen, sin d’imbersión estra de tiempo y diners en custions loxisticas y de raso zercustanzials á lo treballo en sí mesmo, os míos prenzipals gastos son l’ordenador, a linia telefonica y o Rete, mantenimiento de a mía infraestrutura en o Rete (paxina web, serbizios barios, ….), cursos de formazión á los que i boi, ezetera.

En iste contesto, o gasto más desproporzionato de a mía autibidá ye a conduta d’autonomos, combirtiendo á l’Estau en una de as grans menazas de a mía autibidá profesional.

Iste aforro de gastos y de tiempo no tiene cosa que beyer con o low-cost. Se trata de efizienzia y rendimiento aprofeitando recursos ta adubir balor reyal.

3. Una formula acomodata y buena ta o meyo ambién

L’aforro de desplazamiens á lo treballo y de preparazión de chentas sinifican bentaxas antiparti de as económicas de raso:

  • S’ebitan emisions de contaminantes á l’atmosfera, en una cantidá que puede estar sinificatiba en o conchunto d’autibidaz normals d’una persona;
  • Se minimiza o emplego d’embases y ferramientas ta la chenta;
  • S’aforra o tiempo perdito, que puedes adedicar á lo propio treballo u á amillorar a conziliazión con a tuya bida personal;
  • por ixo, s’aprofeita a teunolochía como una ferramienta que fa o treballo muito más comodo y que amillora a calidá de vida.

Si paras cuenta, un buen desembolique d’ista traza de treballo chunta os tres aspeutos que carauterizan o desembolique sostenible: economico, meyoambiental y sozial.

Por ixo, iste ye o mío prenzipal oxetibo: fer a mía autibidá sostenible. Queda muito por debán porque seis meses son sólo que o prenzipio de l’escomenzipie pero, por o inte, soi esfrutando de o camino.

2