O sagrato Maat de o planeta Tierra

This post is also available in: Spanish

la_pirámide_inmortalFa bels días leyé “La pirámide inmortal”, zaguera nobela de Javier Sierra.

*Nota sobre o libro: Anque como leutura me fazieron goyo más atras nobelas suyas, como "El maestro del o Prado" u "La cena secreta”, a zaguera nobela de Javier Sierra ye alazetal ta conoxer a naturaleza d’iste sobrebueno aragonés. También, ta escubrir o enigmático episodio echipcio de a bida de Napoleón Bonaparte.

De toz os temas que trata o libro, bi’n ha un que me clamó asabelo l’atenzión: o Maat.

Seguntes Wikipedia, Maat ye un conzeuto abstrauto de chustizia unibersal, d’equilibrio y armonía cosmicos que dominan en o mundo dende o suyo orixen y que cal conserbar  [1]

En “La piramide inmortal”  ba esplicando-se á lo largo de tot o libro. Maat yera un de os balors alazetals que guiaba a bida de os echipzios:

“Tot o funcionamiento de l’uniberso, seguntes ér, yera resumito en ista milenaria parola echipzia: equilibrio. Cuan yera de buenas, no tardaba en predicar que no puede bi haber bida sin de muerte. O nuei sin de día. O primabera sin d’ibierno. Y que si er furtaba a plega á un defunto, o suyo dominio de o Maat li obligaba á emplegar una parti de os benefizios en salbar á bel dolento. O que si preneba a dezisión d’aduyar á un amigo, tamién debeba amortar á un enemigo. Os suyos autos podeban parixer traxicos á os que no lo trataban, pero obedexeban á un particular y milenario sentito de a chustizia”

“Tot en a creyazión ye un equilibrio entre dos polos. Maat”

Maat ye un de os terminos unibersal, un “d’os pilars de a tierra“ presén en a istoria de toz os pueblos, independientemén de o puesto y tiempo que lis tocó bibir y de as suyas relixions, culturas u creyenzias en cheneral:

“A toz mos afeuta”

“Probidenzia, destino, fuerza mayor, plan supremo, desinnio, esdebenidero,.. Toz istos son os terminos con os que os pueblos de a Tierra se refieren á la más renombrata manifestazión de o Maat.  Ta mantener o equilibrio de l’uniberso, iste manulla as nuestras bidas de una traza que mos resulta incoderén. Mos coneuta, queramos u no pas, mos cruza y mos enfila”

Güe, si bi ha un termino con o que nombrar a l’antigo Maat echipzio, ixe ye sostenibilidá. Comprenderás agora por qué me trucó o ficazio iste tema de o libro: ye un tema de o que trata iste blog.

Si un echipzio de a epoca de os faraons beyese güe l’estato de o planeta Tierra, dizirba que bi ha zierto alexamiento de o Maat.  Beyería asabelos indicadors que leban á que o balanze cheneral de o planeta Tierra ye muito defizitario. Tamién mos dizirba que no mos alticamásemos, que tot tornaría a la suya situazión d’equilibrio. Que cuan l’equilibrio se tranca, lo fa de traza temporal, dica que fuerzas mayors estabilizan un atra bez a situazión”:

“Dengún maldau, por fortal que siga, puede mantener-se ta cutio contra l’equilibrio de a naturaleza […] Asinas treballa o Maat”

“Ya trobará o suyo Maat más tardi”

A custión ye a traza en que s’alcalze o equilibrio que, en que más s’enample, más complexo estará restablexer.

“Ye o chusto. Ye Maat”

Desembolique sustenible, o sagrato Maat de o planeta Tierra.

Referenzias:
[1] WIKIPEDIA, 2 de setiembre 2014. Maat. http://es.wikipedia.org/wiki/Maat. Consultato 15 setiembre 2014.
SIERRA, Javier. 2014. La piramide inmortal - el secreto egipcio de Napoleón, primera edizión agosto 2014. Editorial Planeta. Paxinas 37, 38, 112, 150, 158, 164, 220, 243, 255, 259, 289.