A paradoxa de o cutter y a cultura prebentiba

This post is also available in: Spanish

Antezedén 1:

Fa bellas semanas (23.ab), o portal Prebenzión Integral publicó una notizia d’un azidén de treballo:

 “[…] un operario espezialista de Gamesa que treballaba en a planta de As Somozas sofrió un azidén laboral con risultato de lesions graus en un güello. En concreto, tenió un forato corneal y rancamiento de l’iris, por o que amenistó tratamiento quirurxico, estió ospitalizato 15 días y no se curó dica os 562 días, anque li quedoron racadas.

L’azidén ocurrió cuan o treballador feba fainas de curte d’una tela empapata de rasina emplegando un cutter […]”

L´azidén ye grau y beyer-lo risulta escalafrián. Prexína-te. Luis Buñuel, Un perro andaluz
Buñuel_chien_andalou

Antezedén 2:

Ista notizia se publicó poquers diyas dimpués de rematar as presentazions de a campaña “Seguridad y salud + cerca de la escuela”, de @FLC_Aragon, en a que he estato colaborador.

Como a campaña establexeba, as presentazions en as escuelas —d’amostranza primaria— consistieron en una esplicazión de conoximientos y conzeutos alazetals de seguranza en o treballo, con una esclatera conesión y asoziazión con situazions de o día á día en os mesach@S: treballos escolars, faínas domesticas, treballos de bricolache, seguranza bial,…

Y en que os treballos escolars, te puedes prexinar cual estió belún de os inzidens más normals rezentatos por os l’alunnalla? Sí, os curtes por l’emplego de o cutter (por suerte, degún grau)

A paradoxa de o cutter: material escolar o equipo de o treballo?

Cuan os zagals comentaban iste feito —un curte por cutter— a mía prautica profesional me lebaba automaticamén á demandar-lis por as causas, que en toz os casos bi encluyiban o no pas emplego de l’equipo de protezión dengún. Tanto ta l’alunnalla como mesmo ta os propios mayestros, se trataba d’una situazión normal, un perigro asumito. Me parixió que mesmo se me miraban rarizo al planteyar iste debate y o emplego de bel equipo de protezión d’una escuela d’amostranza primaria.

Y metiendo-me en o suyo puesto, tienen de razón: equipos de protezión en clase? Ta curtar con cutter? Si sisquiera en as librerías o botigas de material escolar benden guantes o debangüellos de protezión como parti de material disposable! Isto ye una escuela, no pas un zentro de treballo. Mos mancan un camatón d’añadas ta empezipiar á treballar…

Días dimpués, a notizia con a que empezipia iste articlo: un treballador que se ubre un güello con un cutter tanimientres feba un treballo que amenistaba o emplego de equipos de protezión. Un cutter parellano á o que fan serbir os mesaches dende amostranza primaria y bels equipos de protezión como os que no pas s’emplegan en a escuela.

Ye esclatero que un escolano de primaria no ye un treballador y, por o tanto, no tendrá un azidén laboral. Pero sí tiene de güellos: os güellos d’un nino.

En iste inte ye cuan paras cuenta de a endrezera que bi ha por debán no sólo que os escolanos-futuros treballadors, si no en os propios zentros d’amostranza, con os furnidors de material (escolar y profesional) y con muitos atros ambitos y entidaz que, difuera de l’ambito profesional, cheneran os mesmos perigros que cualsiquier treballo…

… Cultura d´a seguranza