Treballo y muller en tres datos impautans

This post is also available in: English, Spanish

Que en l’ambito de o treballo bi ha desigualdá de chenero ye bien conoxito. En bels puestos más que en atros y en determinatas epocas más que en bellas atras, as condizions laborals de a muller han estato, por o cheneral, piors u prou piors que as de l’ombre.

Y asinas contina estando güe, mesmo en a fortal soziedá europeya, an as mullers se i troban en desbentaxa respeuto á os suyos compañers-ombres en todas as dembas de o treballo: en o tocante á o chornal, reconoxedura y categoría profesional, responsabilidaz feitas y autoridá atorgata, orario y posibilidaz de promozión.

Antimás, á la fin, istas desigualdaz por custión de chenero en tienen consecuenzias encara más graus: as mullers suportan más discriminazión, enriste y biolenzia, cada begata más esposatas á periglos psicosozials, sufren más estrés y trastornos musclo-esqueleticos.

etui_conference_banner_300x150_mediumFa bellos meses bi estié en Bruselas en a Conferenzia Intrenazional “Treballo y Salú en a muller”, organizata por o Istituto de Sendicatos Europeyos (European Trade Union Institute, ETUI). Astí i fablaron d’istas y muitas atras dembas rilazionatas con treballo y muller.

Pero de toda a informazión que s’espardió, que estió muita, bi abió tres feguras sobre a desigualdá de chenero que me fazieron espezial ficazio. Unas por o esclatero d’un grafico que i reflexa una reyalidá de raso (cantidá) y en atros casos porque califican bels balors de a soziedá (en terminos de calidá). Son istas:

1. Menos treballo reconoxito, pero más treballo en total

Iste grafico de a dreita amostra o porcentache de treballadors de 15 á 64 añadas que en treballan á tiempo parzial.

ETUI_conf_part_time_work
FAGAN,olette. Presentation: Gender, working conditions and health – headlines from the European Working Conditions Survey. ETUI International Conference “Women´s health and work”. 4-6 March 2015. Brussels.

Se i troban ordenatos por Estatos Miembros de a Unión Europeya.

En royo, ombres. En azul, mullers. O risultato s’esplica solo.

A unica chustificazión alto u baxo oxetiba á ista esferenzia estarba que á trabiés de l’achuste á tiempo parzial, s’amillora a compatilibidá de o treballo con fainas que, por naturaleza, solo puede fer-las a muller, como a lautanzia, empreñadura,…Pero encara que parando cuenta d’iste fautor, ye razonable semellán desequilibrio? Yo me pienso que no pas, dezididamén.

En una interpretazión simpla d’ista fegura, bella presona puede pensar-se que isto ye mesmo bueno. Qué suerte ta eras, que treballan menos que os ombres, no!?

Sin dembargo, ni sisquiera iste planteyamiento ye balido: si se adube o treballo formal y o feito en fainas de casa, risulta que as mullers treballan más oras por semana que os ombres:

ETUI_conf_working_hours
FAGAN, Colette. Presentation: Gender, working conditions and health – headlines from the European Working Conditions Survey. ETUI International Conference “Women´s health and work”. 4-6 March 2015. Brussels.

L’achuste á tiempo parzial, antimás que ta -se suposa- aduyar á la muller en istos determinatos periodos, sinnifica que a funzión de “mai” s’enample á “ama de casa”, cusiradora de ninos, lolos y dependiens, presidenta de a comunidá u, fablando de casos radicals, escoscadora de a ilesia de o lugar á turnos con atras bezinas.

Antimás, istos dos graficos ufren un indizio d’atra reyalidá probata: a incorreuta interpretazión de os treballos á tiempo parzial. Si paras cuenta, a menor cantidá d’oras bosatas treballatas por mullers que por ombres (en o segundo grafico, barras en azul) no i reflexa a mesma proporzión que a reflexata en o primer grafico. Ye dizir, os treballos á tiempo parzial muitas begatas s’enamplan en barias oras más de treballo difuera d’achuste.

2. Si yes muller, rai o tuyo d´estudeos: ban á amorlar-te o mesmo

Ya desincusarás por meter a parola “amolar”. Ese quedato millor “te ban á tratar de a mesma traza” y asinas he pensato en meter-lo. Pero dimpués de tot o escrito dica agora, ese estato bella cosa descarato escribir as parolas “tratar de a mesma traza”.

Iste grafico de barras amostra a presenzia d’acoso psicoloxico seguntes o ran d’estudeos y o secso.

ETUI_conf_harrashment_educational_level
LIPPEL, Katherine. Presentation: L’organisation du travail et les enjeux pour la santé: mêmes défis pour les travailleurs et les travailleuses?. ETUI International Conference “Women´s health and work”. 4-6 March 2015. Brussels

Como puedes beyer, en o caso de os ombres, o porcentache d’enrestida baxa gradualmén seguntes mayor ye o ran d’estudeos.

No ye que o ran d’estudeos siga razón ta enrestir más o menos á un treballador. Iste ye un tema aparti. Pero a reyalidá ye que, tanimientres en o caso de os ombres o ran d’estudeos ye un fautor que influye en a enrestida, en o caso de a muller no ye asinas, dando-se mesmo a baruca de que as mullers con estudeos unibersitarios sofren mesmo más enrestida que as mullers con estudeos de primaria.

Ye dizir, tanimientres que á un ombre se li rispeta seguntes o suya ran de formazión, a una muller, no pas. E isto mesmo ocurre cuan se fabla de categoría profesional y puesto aintro de a organizazión.

3. No son barrenadas: ye a desigualdá, matután

En iste contesto, no ye estranio que bi aparexcan datos como os amostratos en as dos siguiens feguras.

A primera, amostra o porcentache de salú mental en situazión de perigro seguntes a profesión.

En azul, os ombres. En royo, as mullers. A esferenzia ye, un atra bez, sinnificatiba.

ETUI_conf_mental_health_women
FAGAN, Colette. Presentation: Gender, working conditions and health – headlines from the European Working Conditions Survey. ETUI International Conference “Women´s health and work”. 4-6 March 2015. Brussels

 

Os fautors psicoloxicos en son, como beyes, importans, pero no ye solo que ixo. As carauteristicas de os treballos en a suya mayoría feitos por mullers (sanidá, cusitato de dependiens, casa, escoscadura, amostranza, almenistrazión publica, restaurazión…) aduben un atra mena de perigros como os sobre-esfuerzos, esposizión á achens quimicos y fesicos, mobimientos repetitibos, cansera postural, achens bioloxicos, ezetera.

“Isto mete ficazio en a ideya entibocata de que o treballo de as mullers ye menos desixén dende o punto de bista fesico y mental. A combinazión de perigros fesicos y organizazionals, a rilazión entre o treballo bosato y no pas bosato de as mullers, chunto con a esposizions de perigros combinatos y a dificultá de trobar un treballo estable y o suyo impauto en a seguranza y salú de as mullers, cal que siga estudeato prosimamén” [1]

O zaguer risultato ye que as mullers en tienen más problemas de salú y piors rans de bienestar que o ombres, siga cual siga l’autibidá feita.

ETUI_conf_wellbeing
FAGAN, Colette. Presentation: Gender, working conditions and health – headlines from the European Working Conditions Survey. ETUI International Conference “Women´s health and work”. 4-6 March 2015. Brussels.

Isto, o que rebela ye un dato que ya no ye que custione os balors de as organizazions -publicas y pribatas- respeuto de o chenero de os treballadors. As condizions de treballo de as mullers reflexan un desempeño muito defizién y poco profesional de as funzions de recursos umans y seguranza y salú laboral, que han dixato de costau á tot un coleutibo de treballadors, nada menos que o femenín.

En iste contesto, no ye estranio que a igualdá de chenero se siga combirtiendo en un punto clau, cuasi con delera, ta as organizazions, empezipiando por as almenistrazions europeyas, enrestidas por una piramide de poblazión de raso insustenible con as autuals politicas laborals y sozials. Pero iste ye un atro tema.

Referenzias:
[1] EUROPEAN AGENCY FOR SAFETY AND HEALTH AT WORK. 2014. New risks and trends in the safety and health of women at work. https://osha.europa.eu/en/publications/reports/summary-new-risks-trends-osh-women. Pag 8. Consultado 19 mar 2015. 
Bibliografía:
EUROPEAN AGENCY FOR SAFETY AND HEALTH AT WORK. 2014. New risks and trends in the safety and health of women at work. https://osha.europa.eu/en/publications/reports/summary-new-risks-trends-osh-women. Consultado 19 mar 2015. 
FAGAN, Colette. Presentation: Gender, working conditions and health - headlines from the European Working Conditions Survey. ETUI International Conference “Women´s health and work”. 4-6 March 2015. Brussels. 
LIPPEL, Katherine. Presentation: L’organisation du travail et les enjeux pour la santé: mêmes défis pour les travailleurs et les travailleuses?. ETUI International Conference “Women´s health and work”. 4-6 March 2015. Brussels.