Aragon Valley Classic: a zoqueta, o equipo de protezión indibidual más simbolico de l’agricultura

This post is also available in: English, Spanish

Una zoqueta ye una pieza de fusta tallata en forma de cuña bueda, de traza que i cullen cuatro didos d’una man. S’emplegaba antigamén por os agricultors como azesorio de a foz, ta curtar yerba de traza manual: con a man protexita por a zoqueta s’agafa un manullo de yerba, tanimientres se curta a yerba con aduya de a foz.

Si t’has criato o tiens rilazión con o mundo rural, l’abrás beyita muitas begatas. Ye toda una ripresentazión de l’agricultura tradizional.

Iste mesmo maitín, o mío tío Ernesto m’ha feito una contrimuestra de o suyo emplego:

IMG_1362   IMG_1360

Anque ye de muito antis á las normatibas europeyas de seguranza y á os modelos de fabricazión y resistenzia de materials que autualmén en son balidos, a zoqueta ye un equipo de protezión indibidual en toda a suya amplaria:

“[…] se replecará por equipo de protezión indibidual cualsiquier equipo destinato á estar lebato o soxetato por o treballador ta que li protexa d’un o barios perigros que puedan menazar a suya seguranza o a suya salú en o treballo, asinas como cualsiquier complemento u azesorio destinato á ixa fin […] [1]

Artíclo 2.1 d’a Direutiba 89/656/CEE.

En o caso de a zoqueta, me remera atros tan importans en l’autualidá como o meyo ambién u a sustenibilidá, an os nuestros mesmos lolos poderban dar-nos bella lezión. Ta ers, cosas como l’aprofeitamiento de recursos, efizenzia y aforro enerxetico, probeito de l’esfuerzo, reparazión y esbielle de materials, no yeran ni modelos creyadors de desembolique ni campañas de comunicazión de cosa, ni zertificazions de conformidá, ni modelos de produzión. Yeran a traza de bida que caleba ta marchar entadebán.

En o caso de a zoqueta, istinto de superbibenzia e inchenio de raso.

Referenzias:
[1] EUR-Lex. Direutiba 89/656/CEE de o Consello, de 30 de nobiembre de 1989, relatiba a las disposizions menimas de seguranza y de salú ta l'emplego por os treballadors en o treballo d'equipos de protezión indibidual, artíclo 2.1. http://eur-lex.europa.eu/LexUriServ/LexUriServ.do?uri=CELEX:31989L0656:ES:HTML. Consultato 20.08.2014.